Cooperacion Jornalet / La Setmana

Joined HandsAprès qualques jorns de discussions amb lo conselh de la Federacion Interregionala dels Mèdias Occitans (FIMÒC), que los dos mèdias ne fan partida, La Setmana e Jornalet venon de validar un acòrdi de cooperacion amb la tòca d’afortir e melhorar la premsa en occitan.

D’un costat, lo redactor en cap de Jornalet collaborarà a l’escritura de la version papièr de La Setmana, çò que pòt permetre de desvolopar cèrts subjèctes, dont qualques unes publicats d’en primièr en linha sus Jornalet, en los presentar d’un autre biais. A la diferéncia del numeric, pensat per legir lèu, comentar, debatre e partejar suls rets socials, la premsa de papièr permet de presentar de tèmas en prigondor.

En mai d’aquò, lo partenariat tòca tanben la cooperacion entre los dos sits Internet de La Setmana e de Jornalet que poiràn reproduire liurament lors contenguts.

Enfin, los dos mèdias faràn de reünions periodicas per parlar de l’actualitat, escambiar d’informacions e partejar lo trabalh.

Lo primièr numèro de La Setmana en cooperacion amb lo redactor en cap de Jornalet serà lo 1078,  datat del 9 de junh de 2017.

Lo pache se faguèt dimècres passat 10 de mai, amb un veirat de l’amistat e un brinde via Skype, en preséncia dels confraires de Viure al País; per ansin, n’auretz lèu d’informacions dins l’emission occitana de France 3 e sul Blòg Occitan d’aquela cadena de television.

 

Tèxt tirat de: Jornalet



Els comentaris estan tancats.

Torna a l'inici ↑