Lo Jornalet a l’Ostal Sirventés
Dempuèi 5 ans, cada jorn (o puslèu cada nuèit), dempuèi Barcelona, lo Ferriòl Massip met en linha lo Jornalet : informacions en occitan, tribunas liuras,…
Lo Ferriòl serà aqueste dimècres 8 de febrièr, a 18h30, per parlar de las condicions de realizacion del Jornalet, e tanben de las perspectivas de desvolopament.
Aqueste rendètz-vos s’inscriu dins Las Febrejadas de Sirventés.
Programa de Las Febrejadas:
Lo divendres 3 de febrièr (18h30) se farà l’estrena d’una mòstra de pinturas de Miquèla Fumat : Agachadas / Regards. L’artista, que viu a Narbona, es pastada d’influéncias miègterranencas. Cada gèste se noirís de lum per balhar a cada cara un esclat particulièr. Cada tablèu presenta un retrach de monde d’aicí o d’endacòm mai, de mainatges o d’adultes ont senhoreja la fòrça dels agaches.
Diluns 6 de febrièr (19 h ; sus reservacion : 04.68.25.19.78 o ostal.sirventes@wanadoo.fr ; participacion : 10 €), se farà una tasta qu’aligarà cervesas (las de la brassariá Ciutat a Carcassona) e formatges : unes maridatges a descobrir e a se ne perlupar !
Dimècres 8 de febrièr (18h30), Ferriòl Massip farà lo punt suls 5 ans de vida del jornal quotidian e informatic Lo Jornalet qu’anima dempuèi Barcelona per balhar un agach occitan sus l’actualitat dels pòbles e per ofrir espacis de discutida e tribunas.
Divendres 10 de febrièr (18h30), lo mont Alaric serà presentat per Felip Marcy (Vilatges Al País) jos d’angles divèrses, represes dins l’obratge recentament paregut que met en abans sa plaça particulièra dins lo païsatge audenc entre Corbièras e Menerbés.
Las Febrejadas son organizadas pel Cercle Occitan del País de Carcassona e l’Institut d’Estudis Occitans-Aude, amb lo sosten de la Comuna de Carcassona e del Conselh departamental d’Aude.
Tèxt tirat de: Ostal Sirventés.