Tròces de vida

Tròces de vida. Gairal. Sèrgi. 2021. Grelh roergàs.

En occitan (lengadocian) (fichièrs audio disponibles sus Internet).

Lo vinten obratge de Sèrgi Gairal. Après una tièira de romans, en occitan o bilingües, après la revirada de tròces causits de Dòn Quichòt e dels Entremeses de Cervantes, après un recuèlh de mots crosats e un d’’istorietas, nos ofrís aicí un ramelet de quaranta tèxtes : de remembres, d’anecdòtas, de scènas e situacions divèrsas, recentas o ancianas, comunas o excepcionalas, realas o somiadas, urosas o malurosas, una granda varietat de tèmas, lo rebat de nòstra vida de dròlles, de joves, d’adultes e de vièlhs.

Mas l’escrich sufís pas per far viure una lenga, encara mens per l’aprene. Per parlar de lenga viva, la cal ausir. Per l’ensenhar e la transmetre, cal dispausar de testimoniatges orals. Es per aquò que prepausa una version audio d’un vintenat de tèxtes del recuèlh qu’òm pòt escotar en clicar aicí. Un ramelet oral per far viure la lenga encara mai, o pel plaser de l’ausir, tot simplament.

114 pag.