Cardo, coma l’escritura rèsta en lo temps
Lo passat divendres sièis de març faguèrem la vint-e-tresena session del Club de Lectura. Legiguèrem Cardo, de Sarah Laurent-Zurawczak. Es una autora jove qu’a pas gaires d’òbras editadas, mas n’a recebut prèmis per caduna d’elas.
La session foguèt plan agradiva perque aguèrem la participacion de l’autora. Aprenguèrem plan mai de causas dels contes que forman part del recuèlh. Per exemple ara sabèm que son d’istòrias vertadièras racontadas per la maire de Sarah, e que un bon nombre dels personatges son reals. Coneissèm tanben lo secret de l’oralitat de sos contes. Sabèm tanben que ela es pas contenta de l’edicion perque i mancan doas istòrias (i aguèt un problèma de darrièr moment amb lo manuscrit), e que dempuèi de sa publicacion la maire li racontèt doas nòvas istòrias que aurián fach encara mai redond lo libre.
Parlar amb Sarah nos balhèt l’oportunitat de poder rire amb ela de l’istòria de la prostituïda e la cata (de vertat que legir aquò fa s’escacalassar de rire), nos emocionar amb los fats, viatjar en lo temps amb las sasons e la fèbre de dissabte al ser e parlar de coma l’escritura rèsta en lo temps e fa que lo passat demòri amb nosautres.
Tot aquò faguèt que li pausèrem la question de quand aurem un nòu libre sieu o ben se lèu poirem legir l’edicion completa e ampliada de Cardo. Los lectors generals se sap pas quand poiràn legir los contes que mancan a l’edicion, mas los lectors de nòstre Club de Lectura auràn lo privilègi de los legir sulpic. Lèu recebretz un corrièr amb un grandàs present de Sarah! Per çò que fa a un nòu libre d’ela, se sap pas quand serà finit, mas esperarem, que sabèm que valdrà lo còp de l’atendre per contunhar la legissent!
E remembratz, per la session venenta legirem lo libre A cada jorn son mièg lum, del reconegut escrivan Ives Roqueta. La session serà lo divendres 8 de mai a 17 oras.
Dolors Català e Esther Lucea
Coordinadoras del Club de Lectura