Convencion Cirdòc – Tarn
Lo Departament del Tarn e lo CIRDOC signan una convencion en favor de l’occitan
Lo 21 de novembre a Albi, lo Departament del Tarn e lo CIRDÒC, que partejan los meteisses objectius quant a la valorizacion e a la difusion de la lenga e de la cultura occitanas, signèron una convencion de partenariat. Darrièra aquela collaboracion novèla, una meteissa volontat, perseguir lo trabalh d’integracion de la cultura occitana dins los diferents sectors de la vida publica : ensenhament, economia, torisme, arts, cultura, social e mèdias ; en concertacion estreita amb los actors associatius del territòri, e de segur amb lo CORDAE-La Talvera, amb lo qual la collaboracion es ja anciana a l’entorn de las questions del PCI.
Tarn : còr d’Occitània
Desirós de salvagardar e promòure lo patrimòni cultural occitan, lo Conselh departamental sosten dempuèi mai de 50 ans, las associacions qu’agisson en favor de la lenga occitana. Lo Departament del Tarn a passat una etapa novèla en novembre de 2008 quand a nomenat un elegit referent en carga de l’occitan e a creat la mission « lenga e cultura occitanas », cargada de metre en òbra una politica coerenta en matièra de promocion de l’occitan sul territòri tarnés.
Aquela politica intersectoriala, que visa a valorizar lo territòri tarnés e a afortir l’ofèrta de servicis publics en s’apiejant sul patrimòni occitan, concretiza los objectius fixats dins l’« Esquèma Departamental de Desvolopament de l’Occitan 2012-2018 » adoptat per l’Assemblada Plenièra del Departament del Tarn lo 21 de junh de 2012. Aquel esquèma permet tanben d’impulsar d’accions novatrises, de negar de partenariats e de signar de convencions.
Lo partenariat signat entre aquelas doas instàncias a per mira de permetre al Departament del Tarn de s’apiejar sus l’expertisa scientifica e culturala del CIRDOC en matièra de patrimòni immaterial occitan e d’aver accès a sas exposicions, obratges multimèdias, otisses numerics e supòrts d’animacion pedagogica. La collaboracion amb lo CIRDOC assegura tanben una valorizacion e un raionament interregional de las politicas e dels otisses innovants meses en plaça pel Departament del Tarn en matièra d’activacion de la ressorsa occitana. Al travèrs d’aquel partenariat, lo CIRDOC perseguís sas missions centralas de mesa a disposicion de ressorsas patrimonialas pel mai nombroses, afortís sos ligams e sa cooperacion amb las collectivitats localas, institucionaliza sas accions per l’acompanhament de las politicas territorialas axadas sul patrimòni occitan e desvolòpa sa ret de sòcis ja fòrt de 70 actors institucionals, privats coma associatius.
Pendent la periòde 2016-2021, mantuns axes fòrts e estructurants seràn desvolopats pels dos partenaris a fin de portar una politica culturala en favor de l’occitan, que pren en compte los diferents sectors de la vida publica : ensenhament, economia, torisme, arts, cultura, social e mèdias.
Mai d’informacion: Lo Cirdòc