“Acampada de familha e d’autres racontes”
Lo CAOC ven de publicar un recuèlh dels racontes finalistas del “IV Concors de racontes brèus en occitan Enric Garriga Trullols”.
Es amb un fons plaser que lo CAOC vos ofrís aqueste librilhon correspondent al IV Concors de Racontes brèus en occitan Enric Garriga Trullols.
E sèm uroses, coma per las passadas edicions, de constatar lo bon acuèlh que lo concors a levat, la responsa dels escrivans e de las escrivanas que i an participat e lo nivèl dels racontes recebuts.
Podèm pas que nos felicitar, donc, ambe los membres de la Jurada, quand remarcan la qualitat requista dels tèxtes mandats, tant per çò qu’es l’expression, dins una lenga petejanta e mirgalhada que lo legeire pòt pas que se regalar a la legir, coma pel biais dels autors, que mestrejan l’art de debanar lors invencions e vos pivelar.
Unes racontes que compausan una garba ont tot i passa: de la languina que vos pren al ventre a la mòrt dels qu’aimatz o la solesa dels que son a mand de tot pèrdre, a la jòia e l’innocéncia dels pichons, estonats davant l’amor que naseja, o los brams de plaser d’una party de pistachièrs. E que nos an menat d’un recanton perdut en Arièja o en Aran a la sèuva dels aztècas, l’Imalaia o lo Japon d’abans la guèrra, per i encontrar tot un cortègi de personatges susprenents, ambe de formigas que parlan, tuaires de massa, un comitat de mascas que benlèu ne son pas unas, un drac endormit… Una fèsta.
Vos convidam a gaudir amb la lectura d’aquestes tèxtes, mas vos encoratjam tanben a participar a la cinquena edicion del concors aquest an 2024 (mai d’informacion aquí).
📕 Contes publicats:
✍ Acampada de familha. Jean-Marc Rabier
✍ Zibola. Robèrt Pastor
✍ Un café dab Edoné. Jordi Ràfols Brasó
✍ Yobai. Sara Laurenç
✍ La còla dau drac. Jean Claude Puech
✍ Cambiaments de nom. Alan Roch
✍ Empúries. Matieu Poitavin
✍ L’Institucion de Defensa de las Mascas (IDEM). Esther Lucea Teruel
✍ Le tren de la nuèit. Miquèl Ruquet
📚 Podètz comandar lo libre a la Librariá del CAÒC en linha o al burèu (Providència, 42. Barcelona) – 📩 caoc@caoc.cat
🔖7€
Mai d’informacion: caoc@caoc.cat