Avèm ja los premiats del VI Concors de racontes brèus en occitan Enric Garriga Trullols e del II Concors d’ensages D’aura en aura
Sèm arribats a la fin del VI Concors de racontes brèus en occitan ENRIC GARRIGA TRULLOLS e del II Concors d’ensages D’aura en aura.
Per aquesta seisena edicion del Concors de racontes Enric Garriga Trullols, los tèxtes participants son estats vint-e-nòu, alara que d’ensages mandats a D’aura en aura dins sa segonda edicion n’avèm recebut quatre.
E coma per d’autras edicions, çò primièr que nos cal metre negre sus blanc es cossí los autors an capitat a far passar lo plaser qu’es estat lo seu coma creadors als membres de la Jurada, que sèm estats lors primièrs legeires e que, en tot far nòstre trabalh, nos avèm regalat a dintrar dins tant d’istòrias pivelantas…
E se per las annadas passadas n’i aviá un bon pro, de racontes que fasián esprovar al legeire lo bategadís d’una fonsa umanitat, aprèp l’experiéncia del confinhament e la fragilitat qu’aviam esprovat, ongan es puslèu lo capborditge d’un monde que sembla a mand de virar fòl, pres entre l’espectacle descorant de la guèrra, lo cinisme de gabidaires calucs e l’IA, que buta los autors a la satira e a l’escarni de l’estupiditat.
Per quant als ensags mandats a D’aura en aura, podèm dire que la situacion sòcioculturala de l’occitanitat, aclapada pel mesprètz e l’ignorància, contunha de téner lo primièr rèng – e mai se l’umor i naseja, tanben…
E uèi avèm ja los premiats. E ne profitam per felicitar coralament los guerdonats, alara que vos remerciam a totes per la vòstra participacion, en tot vos anonciar que será un plaser pel CAOC de mandar una setena e tresena edicion d’aquestes Concorses per l’an que ven.
Podètz consultar aquí l’acte de la Jurada amb los noms dels premiats.
Lo prèmi serà autrejat dins un acte public lo 26 de junh de 2025. L’acte tanben se tendrá en linha. Los guerdonats e finalistas seràn avertits per corrièr electronic.