Avèm ja los premiats del VII Concors de racontes brèus en occitan Enric Garriga Trullols e del III Concors d’ensages D’aura en aura
Sèm arribats a la fin del VII Concors de racontes brèus en occitan ENRIC GARRIGA TRULLOLS e del III Concors d’ensages D’aura en aura.
Per aquesta setena edicion del Concors de racontes Enric Garriga Trullols, los tèxtes participants son estats setze, alara que d’ensages mandats a D’aura en aura dins sa tresena edicion n’avèm recebut quatre.
D’aquestes racontes, d’unes pòrtan sus un passat de guèrras e auvaris –en Indochina, o en França al temps de l’Ocupacion–, o encara sul capborditge e l’absurditat de nòstra vida quotidiana. Mas es de remarcar que mai d’un se vira del costat dels mites, preses amb una granda familiaritat e empeutats de rason, per nos assabentar de cossí va que l’aiga se gèle en ivèrn, las nivols contunhen de nos far badar o d’unes rocasses retipen de formas umanas. Aquò, a costat de racontes gotics o de la cronica de marranas que van degalhar lo bestial.
Coma cada an donc los membres de la Jurada, que se son regaudits a legir los primièrs aquesta garba de ficcions, es de tot còr que ne felicitan los autors.
Per quant als ensages mandats a D’aura en aura, es sus la lenga e sas milanta facetas que s’interèssan, entre soscadissas etimologicas, d’afars de familha e de filiacion puslèu enrambolhats e l’istoric de la reivindicacion occitana.
E uèi avèm ja los premiats. E ne profitam per felicitar coralament los guerdonats, alara que vos remerciam a totes per la vòstra participacion, en tot vos anonciar que será un plaser pel CAOC de mandar una ueitena e quatrena edicion d’aquestes Concorses per l’an que ven.
Podètz consultar aquí l’acte de la Jurada amb los noms dels premiats.
Lo prèmi serà autrejat dins un acte public lo 25 de junh de 2026. L’acte tanben se tendrá en linha. Los guerdonats e finalistas seràn avertits per corrièr electronic.