Crana muralha, una istòria captivanta
Lo passat 17 de genièr, faguèrem la catorzena session del Club de Lectura ont discutiguèrem de Crana muralha, de Claude Michelet, revirat a l’occitan per Joël Borias. Aquesta istòria captivanta, escricha amb un estil que mescla sensibilitat e ironia, mena lo lector dins lo quotidian d’un òme que consacra sa vida a bastir una paret.
Comencèrem la session, coma d’abituda, amb la lectura d’una nòta biografica de l’autor e d’un tròç poetic de Des grives aux loups revirat a l’occitan per Dolors Català.
Puèi, comentèrem la vida de Firmin contada amb precision e sens res de superflú. Aquesta vida que sembla passar a tota velocitat es marcada per sa decision de se consacrar a un trabalh jutjat inutil pels autres. L’autor tracta aqueste tèma amb una distància ironica que nos fa questionar lo vejaire del vilatge, que lo considèra coma un caluc. Nos pausèrem la question de saber se aquesta vision èra justificabla o comprensibla e fins a quin punt l’ironia de l’autor refortís la critica sociala.
Reflexionèrem tanben sus la soletat de Firmin que passa sa vida sens verai companhonatge e que parla sonque amb de curats. Aquesta isolacion volontària o patida, refortís la dimension tragica del personatge e pausa la question del prètz a pagar per seguir una conviccion intima.
Discutiguèrem encara del sens del libre : es una meditacion sul trabalh e lo sens de la vida o una critica de las guèrras. Analisèrem lo projècte titanic menat per Firmin tota sa vida e lo significat simbolic de la muralha.
Enfin, considerèrem d’autras questions, intemporalas e universalas, malgrat lo fach que l’istòria comença en 1914 : Examinèrem cossí l’orror de la Primièra Guèrra Mondiala, viscuda per de joves de vint ans, poguèt causar de degalhs irreversibles sus d’èssers ja fragils e marquèt lor vision de la vida.
Per conclure comparèrem Crana Muralha amb los libres de Giono, e amb las perspectivas filosoficas de l’existencialisme e de l’absurde en considerant l’impacte de la soletat dins lo raconte e sul lo destin de Firmin.
Per çò que fa a la session venenta, sèm a preparar una edicion especiala del Club de Lectura. Caldrà atendre qualques jorns encara per saber çò que legirem.
Dolors Català e Esther Lucea
Coordinadores del Club de Lectura