“Lo fraire besson de mon paire e d’autres racontes”
Lo CAOC ven de publicar un recuèlh dels racontes finalistas del “V Concors de racontes brèus en occitan Enric Garriga Trullols”.
Es amb un fons plaser que lo CAOC vos ofrís aqueste librilhon correspondent al V Concors de Racontes brèus en occitan Enric Garriga Trullols.
Al CAÒC sèm fièrs d’aver capitat a la consolidacion d’aqueste concors e de recebre d’òbras, tant d’occitans coma de catalans, dins totas la variantas de la lenga occitana.
Esperam que legiretz los contes amb un plaser prigond, es aital que lo CAÒC vos ofrís aqueste recuèlh.
I a ongan de racontes que son d’una ambicion verbala que truca, per çò qu’es de l’expression, e lo legeire pòt pas que se daissar enrebalar, pres dins la fèsta a la quala l’autor lo convida. Alara que d’autres butan de fons a l’art de debanar l’istòria e de nos menar de la man, en nos far descobrir tot un mond. Qualques unas d’aquelas istòrias son d’una simplicitat tota linda, mas capitan a nos esmòure, e d’autras son de verais romans «in nuce», que dins lo cas de se desplegar nos menarián luènh… Per quant als subjèctes, avèm aquí d’istòrias qu’arribèron a las victimas innocentas del passat –coma los enfants preses dins las guèrras–, o que pòrtan sus la solesa, o encara sus la crisi climatica que sèm a patir.
Vos emplaçam a participar a la novèla edicion del Concors per 2025, que serà ja la seisena en çò que tanh als racontes e la segonda pels assages (mai d’informacion aquí).
📕 Contes publicats:
✍ Lo fraire besson de mon paire. Jean-Marc Rabier
✍ Pèire e la balena. Brigida Viginier
✍ Un dimars a Molzona. Alan Vidal
✍ Totes los bruches del mond. Federico Merino Mir
✍ Aquí, plòu! Laure-Anne Caraty
✍ Aschenputtel. Alain Clarac
✍ Doas lengas, una vida. Liliane Zand
✍ La font de la Fachilièira. Chantal Demarest
✍ Lei colors dau pavon. Jean-Claude Puech
✍ La sopa de Joan de l’Ors. Alan Roch
📚 Podètz comandar lo libre a la Librariá del CAÒC en linha o al burèu (Providència, 42. Barcelona) – 📩 caoc@caoc.cat
🔖7€
Mai d’informacion: caoc@caoc.cat