Nòvas del Congrès Permanent de la Lenga Occitana

13 Maig 2020

Malgrat la crisi sanitària actuala, la còla del Congrès Permanent de la Lenga Occitana contunha – en teletrabalh – d’obrar a la creacion de ressorsas e otisses per la lenga occitana.

L’òbra màger del moment es lo projècte europèu Linguatec. Dins aquel encastre, lo pòle TAL (tractament automatic del lengatge) del Congrès es a trabalhar sus la sintèsi vocala en occitan lengadocian e sus un traductor automatic francés-occitan e occitan-francés per l’occitan gascon e per l’occitan lengadocian.

Los lexicografes de la còla son eles tanben a avançar sus d’obratges màgers : lo vèrb’Òc en occitan lemosin, que deuriá espelir dins l’annada, e una version del Basic qu’inclurà totas las grandas varietats de l’occitan (auvernhat, gascon, lemosin, lengadocian, provençal, vivaro-alpenc).

Lo pòle « Lenga e societat », el, es a preparar dos lexics : un lexic de l’audiovisual occitan e un lexic dels tèrmes ligats al COVID-19 e a la crisi sanitària que l’acompanha.

La còla del Congrès es tanben a preparar d’unes otisses novèls :

  • Una plataforma terminologica basada sul tèrm’Òc, mas que permetrà una melhora interaccion amb los usatgièrs ;
  • Un portal del TAL occitan per centralizar las informacions e las ressorsas sul domeni ;
  • Una interfàcia per consultar lo còrpus audio fargat dins l’encastre de la sintèsi vocala en gascon e en lengadocian ;
  • De novèlas API, de novèls diccionaris especials e de jòcs novèls sus la lenga que deurián espelir dins los meses a venir.
  • L’elaboracion del diccionari general panoccitan en occitan que compta ja quicòm coma 20 000 mots definits e illustrats de citacions plan identificadas.

Enfin, Lo Congrès contunha sas activitats costumièras. Es a preparar d’articles novèls per enriquesir l’express’Òc, la Passejada del top’Òc e lo Punt de lenga. Contunha de vos assabentar a travèrs sa letra de ligason e sos malhums socials, e participa totjorn activament a las demarchas en favor de l’ensenhament de l’occitan.

Demoratz informats, un fum de novetats arriban lèu-lèu !

Tèxt tirat de: Lo Congrés

X