Jusèp-Loís Sans Socasau parla sus la situacion actuala de l’occitan, a Canet de Mar
Lo divendres 5 d’octobre de 2012, a uèit oras e mièja del ser se debanèt a la bibliotèca P. Gual i Pujadas de Canet de Mar un acte organizat per la seccion locala de la Plataforma per la Llengua dins l’encastre dels actes organizats a l’escasença del Correllengua, e amb la collaboracion del CAOC.
L’acte comencèt per la lectura completa del Manifèst del “Correllengua2012”, escrit per Màrius Serra e a la seguida se passèt a la presentacion de Jusèp-Loís Sans Socasau, Cap de Politica Lingüistica del Conselh Generau d’Aran, e membre del Conselh del CAOC, que parlèt sus la situacion actuala de l’occitan, nomat aranés en Aran.
I aguèt tanben l’intervencion de Xavier Moral, de la Direcció General de Política Lingüística de la Generalitat de Catalunya.
Un bèl grop d’un quarentenat de personas de tot atge assistiguèron a l’expausat amb interès, çò que se remarquèt en la participacion abondosa del public, que foguèt lèu convidat a prendre part en la charradissa, que s’alonguèt fins a dètz oras e mièja. Demest los assistents a l’acte i aguèt qualques membres del CAOC: Teresa Sanahuja, Carme Tona e Jordi Bosque.