Robèrt Martí, “Padena”

25 maig 2021

Robèrt Martí, “Padena” (Albi, lo 21 de febrièr de 1944 – Rodés, lo 5 de mai de 2021).

Militant cultural, foguèt pendent d’annadas lo president de l’Institut d’Estudis Occitans, sens daissar de caire una òbra escricha de qualitat. Contribuèt tanben a la dobertura de l’Ostal Bodon.

Per plan de monde, èra conegut jos son escais d’artista comic Padena. Exercèt son talent dins son restaurant La Grépia abans de córrer los emponches de tota Occitània per combatre per la fòrça del rire lo nazisme lingüistic francés que patisson nòstra lenga e nòstra cultura.

Doblidarem pas tanpauc sa dobèrtura sul monde, los ligams fòrts amb Catalonha, mas tanben amb plan d’autres.

Robèrt a escrit de paginas bèlas de l’accion occitana. Nos a mostrat lo camin. D’ara enlà nos cal seguir sa dralha. Tornar la fièrtat de la lenga al pòble occitan.

Pendent d’annadas e d’annadas percorreguèt lo país. Anava inalassablament de salas de fèstas en salas festadièras, qualques còps dins de vilatges pichons, d’autres còps dins las vilas. Totjorn las salas èran comolas. Lo monde reservavan d’avança lor plaça. Tant e plan que las associacions lo fasián venir. Èran seguras del succès de la serada. Encara un torn de fòrça de mai a metre al crèdit de Robèrt Martí.

L’ombra doça de la nuèch sortiguèt en 1981 dins la colleccion ATOTS a cò d’IDECO. Es un roman fantastic: lo temps d’un viatge ont, entre passat e present, tot capvira.

Lo balestièr de Miramont sortiguèt en 2006. Es lo darrièr libre paregut de Robèrt Martí, un roman al còp istoric e fantastic. La lectura n’es aisida. La naracion, linda e simple, pren lo lector e lo passetja al fial del temps entre Roergue e Albigés.

Robèrt Martí sap captivar lo lector. S’apiecha per aquò sus una lenga simpla e perfèctament mestrejada.

Clementina Solinhac.

X