“Un dimenge d’estiva e d’autres racontes”
Pel CAÒC es un gòi presentar aquel recuèlh de racontes fruch del “I Concors de Racontes brèus en occitan Enric Garriga Trullols”.
E es estat un plaser pel CAÒC de constatar lo bon acuèlh qu’a recampat, per aquesta primièra edicion, compte tengut de la responsa dels escrivans e de las escrivanas que i an participat e lo nivèl dels racontes recebuts.
En tot, son estats quinze los tèxtes mandats al Concors, un pauc de pertot: d’Arièja, de Provènça, de Lengadòc Bas…, dins una lenga viva que garda per d’unes lo parlar d’origina —e mai dins un cas la grafia dicha mistralenca. Òm diriá que tot i passa: de l’amor a la languina, de la solesa a la galejada, de la corsa fòla d’aqueles qu’ensajan de fugir una vida malastrosa a la beutat del monde qu’espelís a cada ròsa. E i a tanben de racontes risolièrs, d’una fina ironia, sul coronavirus, lo desmembrament de França o lo retorn dels pterodactils.
Lo CAÒC profiecha per felicitar coralament los guierdonats, alara que vos remerciam totes per la vòstra participacion, en tot vos anonciar que serà un plaser per nosautres de mandar una segonda edicion d’aqueste Concors aquest an 2021.
Podètz trapar lo libre a la botiga del CAÒC (Providència, 42, Gràcia, Barcelona).
Prètz : 7€. Mai d’informacion: caoc@caoc.cat