Visca lo sénher president! Una celebracion de la lenga occitana
La vint-e-cinquena session del Club de Lectura foguèt consagrada al libre Visca lo sénher president! de Marc Rossèl. Avèm agut lo plaser de poder escambiar dirèctament amb l’autor, que respondèt a fòrça questions dels participants sus l’òbra, son escritura e sos projèctes.
Los participants an destacat que lo libre lor agradèt fòrça, especialament per las situacions amusantas e los personatges pintoresques que l’emplenan. Foguèron citats la Primièra Dòna e son can, que contribuisson a l’umor de la narracion. Los participants an tanben remarcat la vision critica present dins lo libre sus l’Estat francés e sas institucions, amb una satira del chauvinisme e dels mecanismes del poder. E tot aquò amb fòrça umor anglés.
Un dels aspèctes mai apreciats foguèt la volontat de l’autor de celebrar la lenga occitana. Lo libre foguèt percebut non pas coma un complanh sus la situacion de la lenga, mas coma una invitacion a la far viure, a la festejar e a partejar lo rire. Los dessenhes, òbra tanben de Marc Rossèl, qu’acompanhan l’òbra foguèron egalament comentats e apreciats pels membres del club.
Marc nos expliquèt que son objectiu principal es de suscitar l’interès per l’occitan entre los joves de 20 a 25 ans. Dins aquela perspectiva, trabalha actualament sus de projèctes de musica occitana contemporanèa e internacionala amb l’ajuda de l’intelligéncia artificiala. Segon el, aquela tecnologia pòt contribuir a balhar una vision mai complèta e atractiva de l’occitan, quitament se demòran encara de dificultats, especialament pel tractament de la fonetica. En revenge, l’IA permet d’aumentar considerablament las capacitats de produccion. Diguèt qu’actualament trabalha en la preparacion d’un disque de cançons en occitan fachas mercés a la IA, que benlèu serà publicat a Spotify aqueste mateis an. Tanben a divèrses manuscrits en preparacion.
L’autor expliquèt tanben que sa prioritat es d’escriure e de crear mai que de legir, perque considèra que la produccion de contenguts novèls es essenciala per ajudar a cambiar la percepcion que fòrça joves an de la lenga occitana. Al long de l’escambi, partegèt qualques anecdòtas fòrça interessantas sus son trabalh e son experiéncia.
La session s’acabèt amb los mercejaments dels participants a Marc Rossèl per sa disponibilitat e la qualitat de l’escambi.
Per la session veneta del Club de Lectura legirem Verd Paradís II de Max Roqueta. Mas aquò serà a la represa, bon estiu a totes!
Dolors Català e Esther Lucea
Coordinadoras del Club de Lectura