Dins de patetas rojas, un grand libre d’enfança
Lo passat divendres dètz-e-nòu de junh faguèrem la vint-e-cinquena session del Club de Lectura. Vint-e-cinc libres legits ja son un quicòm! Legiguèrem Dins de patetas rojas, de Maria Roanet. Sabèm pas encara perque, mas foguèt una session amb fòrça problèmas tecnics, amb lo son que a còps arribava plan mas a còps arribava pas a las gens que participavan en linha. Mirarem de trapar la solucion per las amassadas venentas!
Per çò que fa al libre, agradèt a totes los legeires. Es una lectura polida per aprene plan de causas d’aquela epòca de quand Maria Roanet èra una pichona filha. Nos parla dels jòcs, de las bonbonalhas, de çò qu’apren e de çò que pensa. Lo lector d’aquel libre coneis la vida d’una familha qu’a fòrça problèmas economics mercés a l’agach d’aquesta petita filha que o raconta tot amb un biais natural.
Aital la protagonista, Teresa, nos parla de cagadors e de comunions, d’amigas e de salopas, de pesolhs e de tetons. I a pas grandas istòrias, siquenon son pichonetas coma la protagonista, que a cada jorn fa novas descobèrtas que li fan agrandir son monde.
La session nos permetèt conéisser que qualqu’uns dels participants avián jogat als mateisses jòcs que Teresa e avián manjat las mateissas bombonalhas qu’ela. De fach, l’istòria dels cagadors publics e dels ostals sense cabinet èra pas nòva per totes los participants, i aviá de gens que tanben o avián viscut.
Enfin, es una lectura plan recomandable per aprene plan de causas del passat e per nos pausar dins la pèl d’una pichòta filha que nos raconta tot çò que fa e que pensa.
La session venenta serà lo 10 de julhet e legirem lo libre Visca lo Sénher President de Marc Rossèl. Es la lectura perfiècha per aquesta calor que fa. Es pur occitanisme divertissent!
Dolors Català e Esther Lucea
Coordinadoras del Club de Lectura