Occitània, tèrra de rugbí.
Lo Centre Occitan del País Castrés e las associacions Puissance Castres, Les Amis du rugby et l’Amicale an fach tot lo possible per far lusir las marcas per la partida de copa d’Euròpa, entre Castras e Leinster, província irlandesa, lo dimenge 12 de genièr, a 2 oras manca un quart, a l’estadi Pierre-Antoine de Castras.
Fòra de las bandièras bèlas, dels balons, de las capas e dels mocadors, totes estampilhats de la crotz occitana, son milierats d’afichas que seràn difusidas dins los comèrcis de la vila e lo setmanièr Le journal d’Ici, amb tèxtes explicatius sus la lenga, las paraulas del Se canta que cantarem ensemble e la presentacion dels instruments de musica tradicionals: graile e craba. En efièch, una còla d’un vintenat de musicaires, grailaires e crabaires, bailejada per Sòfia de Dixmude, farà conéisser musicas e danças del país. Un biais de valorizar aqueles instruments que s’ameritan plan d’èsser coneguts tan coma binioù e bombard !
Fòra de la mediatizacion, la tòca es l’apropriacion d’aqueles instruments tipics de Sidòbre e Montanha negra pel public. Una marca de mai de son identitat mas tanben un biais de desrovilhar las cambas, de desempolsar unas musicas e tot simplament de far conéisser una part del patrimòni regional, sovent mesconegut perque fòrabandit dels mediàs oficials. Apuèi, s’agís de demorar pas dins un canton d’animacion sonque folcloric mas de viure al present amb dignitat la nòstra cultura.
Vos espèran nombroses per aquela fèsta que marcarà l’istòria esportiva castresa e pus lenc encara, vista la preséncia radiotelevisada : venètz acompanhats e podretz dire dins qualque temps amb fiertat : i èri ! Se uèi, l’occitan se met al rugbí, benlèu que deman, lo rugbí se metrà a l’occitan.
Centre Occitan del País Castrés
« Ostal d’Azalais », 6 rue du Consulat
81100 CASTRES
05 63 72 40 61
azalais@wanadoo.fr