Manifestacion a París per l’ensenhament de las lengas minorizadas
Los collectius d’ensenhaires de tot l’estat francés manifestaràn davant lo Ministèri de l’Educacion.
S’alestís una manifestacion per las lengas autoctònas e minorizadas de l’estat francés a París, per dissabte 30 de novembre. Los diferents collectius d’ensenhaires de las lengas autoctònas perseguidas per las politicas lingüicidas de l’estat, dont l’occitan, planhon la granda reculada dels escassas ressorsas que las avián dins l’educacion publica francesa après la reforma del ministre Blanquer.
Per Occitània, la FÈLCO e los diferents collectius per l’ensenhament de l’occitan (CRÈO) dins las divèrsas circonscripcions escolaras sonadas acadèmias apèlan totes los ensenhaires d’occitan a i participar. Los diferents CRÈO son a organizar d’autobuses. Sembla qu’auràn lo sosten de Calandreta e de las diferentas seccions regionalas e departamentalas de l’Institut d’Estudis Occitans.
La manifestacion èra prevista pel 16 de novembre mas fin finala l’an reportada al 30 en rason de l’anniversari del movement dels Gilets Jaunes.
Mentretant, lo collectiu Per Que Viscan Nòstras Lengas a aviat una peticion sus change.org adreiçada al ministre francés de l’educacion per protestar contra sa reforma qu’implica una granda reculada dels escassas ressorsas que las avián dins l’educacion publica francesa.
Tèxt: Jornalet