Universitat occitana d’Estiu de Nimes, edicion numerica

25 Juny 2020

Una edicion 2020 originala e integralament digitala. Del 07/07 al 10/07 : 4 jorns d’escambis e de debats.

Dempuèi mai de quaranta ans, l’Universitat Occitana d’Estiu (UOE) de Nimes, portada per la MARPOC, constituís un rendètz-vos estival a l’entorn de l’actualitat dels sabers, del debat d’idèas e del rencontre cultural.

Pel primièr còp de son istòria e per rason de la situacion sanitària actuala, l’UOE 2020 se debanarà del 7 al 10 de julhet dins son integralitat en version digitala, sus las ondas e sus Internet, mercés als partenariats nosats per la MARPOC amb Ràdio Lenga d’Òc Montpelhièr, la Rampe-TIO e lo CIRDÒC – Institut occitan de cultura.

Ongan, e per tota la durada de l’eveniment, serà possible pel public interessat d’accedir gratuitament en linha e sus las ondas, als contenguts d’aquela edicion.

L’ensemble de la programacion, de 11:00 a 18:30 serà aital retransmesa en dirècta sus Ràdio Lenga d’Òc Montpelhièr e en vidèo sus la pagina Facebook de la ràdio, partenari de longa data de l’UOE.

Noveltat per ongan, las sessions de la tantossada – conferéncias e taulas redondas – seràn tanben propausadas en dirècte mercés a una plataforma en linha de teleconferéncia, que donarà la possibilitat de seguir en vidèo los escambis e atanben de participar via lo « tchat », amb la mandadís de questions e de reflexions per intervenir dins lo debat.

Una edicion de 2020 definitivament ancorada dins lo sègle XXI que la tematica « Èsser occitan deman ?»,ressondís tot particularament dins lo contèxte actual.

Pendent quatre jorns, taulas redondas e conferéncias propausaràn retorns d’experiéncias, presentacions de projèctes innovants e estudis scientifics sus de questions d’environa (dimars 7 de julhet), d’innovacion pedagogica e de literatura (Poesia e transmission / dimècres 8 de julhet) e numericas (Numeric / dijòus 9 de julh).

Coma 2020 marca tanben lo centenari de la naissença de Joan Bodon, la darrièra jornada propausarà un fòcus sus aquela votz màger de la literatura occitana que sos ressons contunhan de se far ausir dins la creacion occitana contemporanèa (Joan Bodon / divendres 10 de julhet).

E coma cada annada, lo Miegjornauestival de RLO, l’Ombreta d’estiu, vos farà viure al ritme de l’UOE en recampant dins son estanquet artistic e literari, qualques-uns dels convidats d’aquela edicion de 2020.

Cada jorn, tres rendètz-vos vos seràn aital propausats :

11:00 – 13:00 : L’ombreta d’estiu de RLO se met a l’ora de l’UOE (ràdio e video sus facebook) ;

15:00 – 16:00 : Conferéncia (ràdio/visiò)

17:00 – 18:30 : Taula redonda (ràdio/visiò)

Informacions practicas:

Lo programa detalhat.

MARPOC : marpoc30@gmail.com / https://www.ieo30.org/

X