XVI Dictada Occitana a Barcelona

ideadmin on 30 gener 2013

Dissabte 26 de genièr de 2013 faguèrem a Barcelona la XVI DICTADA OCCITANA, a la sala de conferéncias del Departament de la Cultura de la Generalitat de Catalonha (Rambla de Santa Mònica, 8).

Aquesta DICTADA OCCITANA foguèt presidida per la Directora de Politica Lingüistica, Ester Franquesa. I participèron mai d’una seissantena de personas. A la dintrada, Júnia Castellà e Clara Ayats joguèron del violon e interpretèron lo Se Canta e doas borrèias. Puèi escotèrem un messatge e una salutacion del professor d’occitan Bernat Vernhièras e de sos estudiants, que fasián partida de la dictada de la vila de Castras. Alavetz se faguèt la primièra lectura del tèxt de la Dictada d’ongan.

Aprèp comencèt lo concors, amb doas lecturas del tèxt de la Dictada, lecturas faitas pels professors catalans d’occitan Raquel Olivella e Jaume Figueras.

Un còp acabada la Dictada, una jurada compausada pels professors e pels ensenhaires d’occitan faguèt la correccion dels trabalhs dels participants. Après la Dictada, los participants  poguèron gaudir d’un vespralh. A la seguida, i aguèt l’intervencion del grop de musica tradicionala occitana Fonèsia amb la soprano Mireia Latorre e lo musician Peter Krivda.

Fin finala, arribèt lo moment de conéisser los ganhants d’ongan. Doas representantas de la jurada, Raquel Olivella e Meritxell Pueyo, legiguèron los noms dels diferents premiats, dins las categorias de joves e d’adultes, que son:

JOVES

Primièr prèmi: JORDI CASTELLS

Segond prèmi: ROGER FERRAN

 

ADULTES

Primièr prèmi: AGUSTÍ FARRAN

Segond prèmi: JOSEP ESTRUCH

 

Los primièrs ganhants de cada categoria ganhèron, en mai dels prèmis balhats a aquel moment, una borsa per assistir a l’EOE ongan, e los 10 primièrs classificats del concors aguèron de prèmis especials.

An collaborat los Departaments d’Ensenhament e de Politica Lingüistica de la Generalitat de Catalonha, Pagès Editors, Diari Ara, La Vanguardia, Gran Enciclopèdia Catalana, Publicacions de l’Abadia de Montserrat, Ara Llibres,  Sàpiens, La Setmana, Plataforma per la Llengua, Associació Conèixer Catalunya (ACCAT), Teleòc, La Caixa e BTV.

[mudslide:picasa,0,caoc.cat,5839369226280976673]