Rècord de participants a la Dictada de Barcelona
Pendent la Dictada 2016
Dissabte 30 de genièr de 2016 s’es debanada a Barcelona la XIX DICTADA OCCITANA, dins la sala de conferéncias del Departament de la Cultura de la Generalitat de Catalonha (Rambla de Santa Mònica, 8), organizada pel CAÒC e amb lo sosten del govèrn catalan.
A balhat la planvenguda a totes lo responsable d’afars occitans a la Direcció General de Política Lingüística de la Generalitat de Catalunya, sénher Xavier Moral. I an participat noranta sièis (96) personas.
Òm ausiguèt d’en primièr un messatge e una salutacion de Bernat Vernhièras, professor d’occitan, seguida de la lectura de la dictada pel professor Vernhièras. Puèi, se faguèt la primièra lectura en Barcelona del tèxt de la Dictada d’ongan. És alara que comencèt lo concors, amb doas lecturas del tèxt de la Dictada, lecturas faitas pels professors d’occitan del CAOC Jaume Figueras i Trinité Perant.
Demèst los participants a la Dictada en Barcelona i èra Mireia Boya, deputada al Parlament Catalan pel grop parlamentari de la CUP; lo president de l’Academia d’Estudis Araneses, sénher Josep Loís Sans Socasau; Pere Mayans, lo cap del Servici d’Immersion e Acuèlh Lingüistic de Catalonha; Montserrat Gimeno, en representacion d’Òmnium Cultural.
La Dictada finida, una jurada compausada pels professors e pels ensenhaires d’occitan faguèt la correccion dels trabalhs dels participants. Après la Dictada, los participants poguèron gaudir d’un vespralh. A la seguida, lo professor d’occitan Jaume Figueras faguèt una parladissa sus los folkloristas occitans coma Antonin Perbòsc o Blader e racontèt Joan de l’Ors.
Fin finala, arribèt lo moment de conéisser los ganhants d’ongan. Los representants de la jurada, Thiago Mori e Pere Jimenez, legiguèron los noms dels diferents premiats, dins las categorias de dròlles e d’adultes, que son:
ADULTES
Primièr prèmi: Arnau Ferrer Abelló
Segond prèmi: Carles Pino Andújar
DRÒLLES
Primièr prèmi: Pau Bofill Amorós
Segond prèmi: Joana Calsapeu Ontiveros
PROFESSIONAL
Primièr prèmi: Ferran Hidalgo Caixal
Lo primièr ganhants adult ganhèt, en mai dels prèmis balhats a aquel moment, una borsa per assistir a l’EOE ongan, e los altres classificats del concors aguèron de prèmis especials.
An collaborat a aquela edicion de la Dictada Occitana los Departaments d’Ensenhament e de Politica Lingüistica de la Generalitat de Catalonha, Editorial Rosa dels Vents, Casa Graupera, Cerveses Moritz, Productes de la Terra, Pagès Editors, Diari Ara, La Vanguardia, Gran Enciclopèdia Catalana, Ara Llibres, Sàpiens, Plataforma per la Llengua, Òmnium Cultural e CNPL Gràcia.